Poslovne vijesti - Makedonija

Ски-центар ќе никне на Јабланица

Жичница долга околу 3,5 километри ќе се гради на врвот од планината Јабланица.

За таа цел деновиве ќе се распише тендер, а според градоначалникот на Вевчани Цветомир Угриноски, скијачкиот терен ќе биде лоциран во месноста викана Голина, додека проектот ќе биде изграден најверојатно со јавно-приватно партнерство и ќе биде готов за 12 месеци.

- Документацијата е подготвена и деновиве ќе се распише тендер за изведувач. Најверојатно ќе биде странски изведувач и мислам дека се заинтересирани Австријци. Сето тоа ќе чини околу 250 илјади евра - појасни Угриноски.

Пред десетина дена, додаде тој, претставници на МЕПСО биле на терен и констатирале дека на ова место има одлични услови за развој на зимскиот туризам. Експерти од Хидрометеоролошкиот завод вршеле испитувања и поставиле мерни станици за да утврдат колку време се задржува снегот на врвот од Јабланица, каде што ќе се гради зимскиот центар.

- Поволност е што снегот на планината се задржува седум месеци. Паѓа во ноември, а се топи во мај и го има во големо количество. Кога ќе се изгради жичницата Охридското Езеро ќе се гледа како на дланка. Природата е многу убава, планината е питома, а до скијачките возила ќе може да се оди со автомобил - рече Угриноски.